Инвестициите во инфраструктурата и авиосекторот придонесоа за значителен раст на туризмот и авиосообраќајот во државата, изјави вицепремиерот и министер за транспорт Александар Николоски, одговарајќи на пратеничко прашање на денешната собраниска седница.
Според Николоски, бројот на патници на двата меѓународни аеродроми бележи раст од над 32 проценти, додека бројот на странски туристи е зголемен за околу 20 проценти.
„Направивме амбициозна агенда, инвестираме сериозно и резултатите се веќе видливи. Имаме раст од над 32 проценти на бројот на патници на двата аеродроми, отворени се 28 нови дестинации, а бројот на странски туристи е зголемен за околу 20 проценти“, рече Николоски.
Тој посочи дека по воведувањето на новата методологија за привлекување авиокомпании, која е одобрена и од Европската Унија, веќе се забележуваат конкретни резултати.
„За периодот од јануари до мај имаме околу 1,6 милиони патници на двата аеродроми. Очекувам до крајот на годината да ја надминеме бројката од 3,5 милиони патници, а во следните неколку години да достигнеме и до четири милиони“, истакна Николоски.
Тој нагласи дека во моментов се реализираат и значајни инфраструктурни проекти за подобро поврзување на аеродромите. Во однос на скопскиот аеродром, Николоски најави проект за железничко поврзување, при што железничката линија би завршувала непосредно пред терминалната зграда.
Паралелно, како што рече, се работи и на подобрување на патната инфраструктура кон источниот дел од државата, вклучително и изградба на нов експресен пат кој ќе овозможи подобро поврзување со Коридорот 10.
Во делот на охридскиот аеродром, Николоски информираше дека е во тек целосна реконструкција и надградба на терминалната зграда, што, според него, дополнително ќе придонесе за зголемување на бројот на патници.
„Во моментов работиме на целосна реконструкција и надградба на терминалната зграда и придружните објекти на охридскиот аеродром. Очекувам во следните два до три месеци сите активности да бидат завршени“, рече Николоски.
Тој додаде дека следен предизвик ќе биде обезбедувањето квалитетни сместувачки капацитети за дополнителните туристи, особено во периодот од октомври до мај, тема за која, како што најави, ќе се разговара и за време на претстојната мисија на УНЕСКО во земјава.
