Николоски: Потребни се фер услови за македонските компании и долгорочни визи за превозниците

Потребата македонските превозници да добиваат долгорочни австриски визи, како и прашањето за нелојалната конкуренција при распределбата на европските грантови, биле меѓу темите за кои говорел заменик-претседателот на Владата и министер за транспорт, Александар Николоски, на македонско-австрискиот бизнис форум во Стопанската комора на Македонија.

Николоски пред деловната заедница истакнал дека, покрај вложувањата во патната и железничката инфраструктура, енергетиката и водоснабдувањето, неопходно е македонските компании да имаат услови за натпревар под еднакви и фер правила.

Тој го отворил и прашањето за европските средства, посочувајќи дека во актуелните постапки често се избираат компании кои не се од Европската Унија.

— реклама —

– Не можам да разберам како е возможно средствата на даночните обврзници на Европската Унија да одат во држави коишто не се од Европската Унија. Имаме сериозна нелојална конкуренција во проектите коишто ги работиме, особено во Планот за раст. Тоа се директни средства од даночните обврзници на ЕУ, а тие одат во земји коишто не се од ЕУ, рече Николоски.

Тој појасни дека кредитите се враќаат од заемопримачот, заедно со каматата, додека неговата забелешка се однесува на грантовите.

— реклама —

– Не се согласувам парите на македонските даночни обврзници, кои ги плаќаат кредитите и каматите, да одат во држави коишто не се од Европската Унија, истакна Николоски.

Говорејќи за економската соработка со Австрија, министерот за транспорт посебно ја издвоил состојбата со македонските превозници и потребата од договор со австриските власти за издавање долгорочни визи.

Николоски посочи дека разговорите траат осум месеци, но досега не дале сериозен резултат.

— реклама —

– Можеме што сакаме да зборуваме овде, но ако нема начин како добро да ја изнесеме робата од Македонија во Австрија и од Австрија во Македонија, бесполезно разговараме, рече тој.

Според Николоски, апсурдно е во 21 век македонските превозници, и покрај признатите либерализации и статусот на земја кандидат за членство во ЕУ која ги започнала преговорите, да мораат да го следат времето поминато во Австрија и да стравуваат од последиците доколку го надминат дозволениот престој.

— реклама —

Македонија веќе има договори со Хрватска и Словенија за ова прашање, а Николоски информираше дека се разговара и со други држави за изнаоѓање соодветен модел.

Тој побара од деловната заедница да помогне во забрзувањето на постапката и да се разговара со надлежните институции во Австрија за постигнување билатерален договор.

– Разговараме сега со уште неколку други држави и ве замолувам да разговарате со соодветните институции и власти за да постигнеме таков договор и со Австрија, за да можат македонските превозници да добиваат долгорочни австриски визи. Да не треба кога некоја компанија планира извоз во Австрија или кога австриска компанија планира извоз во Македонија, да седат на календар и да бројат денови, потенцираше Николоски.