Заменик-претседателот на Владата и министер за транспорт Александар Николоски изјави дека Владата продолжува рамномерно да ги поддржува општините низ државата, посочувајќи дека само во Општина Кисела Вода преку Министерството за транспорт се реализираат проекти во вредност од 386 милиони денари.
Николоски, заедно со градоначалничката Бети Стаменковска, изврши увид во реконструираната улица „Лазар Димитров“, проект финансиран преку Министерството за транспорт во вредност од 3,6 милиони денари.
Тој истакна дека инвестициите во Кисела Вода изнесуваат околу 6,5 милиони евра и претставуваат значајна поддршка за општината, дополнета со средствата од општинскиот буџет.
„Во изминатиот период беа завршени уште пет улици, а вкупно имаме повеќе од 20 активни проекти. И во наредниот период ќе продолжиме да ја поддржуваме општината. Градоначалничката има тим и визија за развој на Кисела Вода и со поддршка од Владата, Министерството за транспорт и Градот, убеден сум дека ќе постигнеме уште подобри резултати“, изјави Николоски.
Градоначалничката Бети Стаменковска нагласи дека со поддршката од Владата и со средства од буџетот на Општина Кисела Вода се реализираат бројни инфраструктурни проекти кои имаат цел да обезбедат поурбани услови и повисок квалитет на живот за граѓаните.
