Во Прилеп се реализираат инфраструктурни проекти вредни околу 9,5 милиони евра преку повеќе програми на Министерството за транспорт, а паралелно продолжува и изградбата на автопатот Прилеп–Битола, информираше вицепремиерот и министер за транспорт Александар Николоски при работната посета на општината.
Николоски, заедно со премиерот Христијан Мицкоски и градоначалникот Дејан Проданоски, изврши увид во реализацијата на инфраструктурните проекти во Прилеп.
Според Николоски, преку програмите на Министерството за транспорт во општината се вложуваат вкупно 580 милиони денари, односно околу 9,5 милиони евра. Средствата се наменети за изградба и реконструкција на улици, водоводна и канализациска инфраструктура, како и за урбан развој.
Дополнително, околу 1,5 милиони евра се вложуваат во изградба на зграда со социјални станови. Николоски најави дека објектот треба да биде завршен до крајот на годинава, а становите да бидат доделени и вселени до пролет.
„Ќе работиме со градоначалникот и на нови проекти“, порача Николоски.
Тој се осврна и на изградбата на автопатската делница Прилеп–Битола, оценувајќи дека работите се одвиваат со добра динамика.
„Крајниот рок останува непроменет, тоа е крајот на 2027 година, но првите километри комплетно завршен автопат, во две насоки, 3+3 ленти со изградени помошни патишта, ги очекувам веќе следната година“, изјави Николоски.
