Николоски: Силен раст на авиосообраќајот, годинава околу 4 милиони патници на двата аеродроми

Околу 4 милиони патници се очекува да поминат низ двата македонски аеродроми до крајот на годинава, изјави заменик-претседателот на Владата и министер за транспорт, Александар Николоски, во поткастот „Каде се парите? со Горан Теменугов“.

— реклама —

Според Николоски, растот во воздушниот сообраќај е значително над првичните очекувања. Тој посочи дека Скопскиот аеродром се очекува да достигне околу 3,6 милиони патници, додека Охридскиот меѓу 350.000 и 400.000 патници.

„Кога бев избран, мислев дека ако стигнеме до бројка 3,5 милиони патници на двата аеродроми до крајот на мандатот, ќе бидам презадоволен, но веќе оваа година ќе имаме околу 4 милиони патници на Скопскиот и Охридскиот заедно. Скопје очекувам да биде некаде околу 3,6 милиони патници, а Охрид од 350 до 400.000 патници“, рече Николоски.

— реклама —

Како една од причините за растот во последните две години, министерот ја посочи новата политика на субвенционирање на авиолиниите.

— реклама —

„Овој енормен раст во 2025 и 2026 година е директен резултат на новата политика на субвенционирање што ја воведовме. Ние воведовме политика на субвенционирање по патник на доаѓање, што ја нема ниту еден аеродром во регионот“, истакна Николоски.

Тој направи споредба со периодот пред две години кога, како што посочи, бројот на патници на двата аеродроми изнесувал околу 2,4 милиони.

Во однос на информациите дека одредени авиолинии се укинуваат, Николоски објасни дека авиосообраќајот функционира според летен и зимски ред на летање, поради што дел од линиите се достапни само во одреден период од годината.