Со воведувањето на новиот АТМ систем во М-НАВ и новиот радарски систем, контролата на воздушниот сообраќај над Македонија се подигнува на повисоко ниво, порача вицепремиерот и министер за транспорт Александар Николоски.
Тој посочи дека новиот АТМ систем има особено значење за зголемување на безбедноста, сигурноста и ефикасноста во управувањето со воздушниот сообраќај.
Според Николоски, потребата од модернизација е уште поголема ако се земе предвид зголемениот број прелети над земјата. Во првите шест месеци од 2026 година е регистриран раст од повеќе од 12 отсто во однос на истиот период во 2025 година.
Дополнително, во 2025 година бил поставен и нов радарски систем на контролната кула во Скопје, кој, според Николоски, се наоѓа во завршна фаза на тестирање.
„Со воведувањето на овие два система – АТМ системот и новиот радар – целосно го покриваме македонското небо на највисоко ниво што во моментот во светот може да се најде во контролата на безбедноста“, порача Николоски.
