Николоски во Подгорица на средба со премиерот Спајиќ: Силно политичко партнерство меѓу Македонија и Црна Гора и засилена економска соработка за развој на регионот

Зголемување на трговската размена, подобрување на транспортната поврзаност и забрзување на европската интеграција беа дел од темите на средбата меѓу вицепремиерот Александар Николоски и црногорскиот премиер Милојко Спајиќ, одржана во рамките на работната посета на Николоски на Црна Гора.

Соговорниците разговарале за можностите за продлабочување на политичките и економските односи меѓу двете земји, како и за регионалниот развој и заедничките предизвици на патот кон Европската Унија.

— реклама —

На средбата било истакнато дека Македонија и Црна Гора се блиски партнери и дека во наредниот период ќе работат на проширување на соработката, особено во економијата и евроинтегративните процеси.

— реклама —

Посебно внимание било посветено на можностите за поголема трговска размена и унапредување на економските врски, како и на подобрување на патната и воздушната поврзаност меѓу двете држави.

Николоски нагласил дека Владата го смета регионалното поврзување за важен дел од развојната политика. Според него, модернизацијата на патиштата и железниците, како и полесното движење на луѓето и стоките, се значајни предуслови за отворање нови пазари, привлекување инвестиции и поттикнување на економскиот раст.

— реклама —

Во разговорите била истакната и европската перспектива на Западен Балкан, при што соговорниците се согласиле дека иднината на регионот е во Европската Унија. Било посочено дека посилната соработка меѓу земјите од регионот може да придонесе за забрзување на реформите и напредок во евроинтегративниот процес.

На политички план, Николоски и Спајиќ разговарале и за актуелните состојби во Западен Балкан, регионалната стабилност и безбедноста, како и за потребата од подобра координација и усогласен настап пред европските партнери.

На крајот од средбата било оценето дека постојат неискористени можности за продлабочување на партнерството, со цел да се постигнат конкретни резултати преку повеќе инвестиции, подобра поврзаност, зголемена трговска размена и побрза европска интеграција на регионот.