Москва во текот на ноќта меѓу 10 и 11 август повторно била цел на напад со беспилотни летала, поради што привремено бил ограничен воздушниот сообраќај на дел од градските аеродроми.
Руските власти соопштија дека противвоздушната одбрана уништила најмалку 13 дронови што се движеле кон главниот град. Информацијата ја објавија градоначалникот на Москва, Сергеј Собјанин, и Федералната агенција за воздушен сообраќај (Росавијација).
Собјанин првично соопштил дека биле соборени седум беспилотни летала, а подоцна информирал за уште шест уништени дронови. Итните служби биле испратени на локациите каде што паднале остатоци од леталата.
Поради нападот, Росавијација вовела привремени ограничувања на аеродромите Домодедово и Жуковски. Авионите можеле да полетуваат и слетуваат само со одобрение од надлежните служби.
Ограничувањата подоцна биле укинати, соопшти руската агенција.
Руските власти и претходно пријавуваа напади со дронови насочени кон Москва. На 28 јули беше соопштено дека десетици беспилотни летала се движеле кон главниот град, а по нападот бил пријавен и пожар во фабрика во Московската област.
