Нов бран поскапувања на храната во Европа, свежите производи најмногу погодени

По периодот на релативно умерени промени, цените на храната во Европа повторно бележат раст, особено кај свежите производи. Дополнителен притисок врз потрошувачите создаваат и повисоките трошоци за енергија и транспорт.

Во септември, цените на храната и безалкохолните пијалаци во Европската Унија пораснале за 0,6 отсто на годишно ниво. Сепак, разликите меѓу земјите се значителни, покажува анализата на „Евроњуз“, заснована на податоци од „Евростат“.

— реклама —

Најголемо поскапување е регистрирано на Кипар, каде што цените се зголемиле за четири отсто. Следуваат Шпанија со 2,7 отсто, Романија со 2,6, Малта со 2,5 и Португалија со 2,4 отсто. Надвор од ЕУ, Турција бележи годишен раст од дури 27,6 отсто.

— реклама —

Наспроти тоа, во 14 од 27 земји членки на Унијата храната и безалкохолните пијалаци поевтиниле. Најголем пад од 6,3 отсто има во Шведска, по одлуката на владата во април да го намали ДДВ за храната од 12 на шест отсто. Пониски цени, меѓу 3,8 и 4,8 отсто, се забележани и во Латвија, Унгарија и Чешка.

Најновите податоци за октомври, сепак, укажуваат на забрзување на поскапувањата кај одредени производи. Во Франција свежата храна поскапела за осум отсто во споредба со истиот месец минатата година, додека во Италија цените на непреработената храна се зголемиле за 7,5 отсто.

— реклама —

Состојбата во јужна Италија дополнително се влошила по протестите на камионските превозници поради високите цени на дизелот, кои предизвикале прекини во снабдувањето на продавниците.

— реклама —

Според прелиминарните податоци на „Евростат“, вкупната инфлација во еврозоната во октомври достигнала четири отсто, највисоко ниво во повеќе од три години. Енергенсите поскапеле за 20,8 отсто, а непреработените прехранбени производи за 4,6 отсто.

Иако растот на цените на храната засега е релативно умерен, европските домаќинства и натаму ги чувствуваат последиците од долгогодишната инфлација.