Македонија меѓу земјите со најниски цени на храната, но колку е таа достапна?

Македонија е меѓу европските земји со најниски цени на прехранбените производи, покажува анализата на „Еуроњуз“. Кошница со 18 основни производи кај нас чини 43,90 евра, додека просечната цена во Европската Унија изнесува 69,84 евра.

— реклама —

Според индексот на цените на храната, Македонија има вредност од 59,8, што е значително под просекот на ЕУ, поставен на 100. Поевтина храна има само во Молдавија, со индекс од 57,2. Меѓу земјите со пониски цени се и Босна и Херцеговина, Србија и Романија.

— реклама —

На спротивниот крај е Швајцарија, каде што истата кошница чини 137,90 евра. Високи цени има и во Норвешка, Луксембург, Австрија и Данска. Меѓу најголемите европски економии, Франција е најскапа, со кошница од 87,40 евра.

— реклама —

Сепак, пониските цени не значат автоматски дека храната е подостапна за граѓаните. Анализата предупредува дека за реална споредба треба да се земат предвид и приходите, односно колкав дел од месечните примања се троши за основните потреби за исхрана.

Врз цените влијаат повеќе фактори, меѓу кои трошоците за работна сила и енергија, транспортот, складирањето и локалните економски услови. Затоа, иако Македонија е меѓу земјите со најевтина храна според номиналните цени, тоа само по себе не покажува колку лесно домаќинствата можат да ги покријат трошоците за исхрана.