Од Левица денеска преку соопштение обвинија дека доцнењето на исплатата на породилните надоместоци продолжува и покрај промените во раководството на Фондот за здравствено осигурување, оценувајќи дека институциите не го решаваат проблемот со кој, според партијата, се соочуваат голем број родилки.
Од партијата тврдат дека и во втората половина на јули има мајки кои сè уште не ја добиле исплатата за месец мај, оценувајќи дека доцнењето станало редовна практика.
Во соопштението Левица наведува дека породилниот надоместок е законски загарантирано право кое произлегува од работниот однос и уплатените придонеси, а не социјална помош. Според партијата, доцнењето на исплатите ги доведува родилките во тешка финансиска состојба во период кога имаат најголеми трошоци за новороденчето.
Левица упатува критики и кон Владата, обвинувајќи дека не обезбедува навремена поддршка за мајките и дека најавите за семејни политики не се придружени со конкретни мерки.
Воедно, партијата посочува дека нов директор на Фондот за здравствено осигурување е Златко Перински, но тврди дека промената во раководството не донела промена во исплатата на породилните надоместоци.
Од Левица бараат итна исплата на сите заостанати породилни надоместоци, воспоставување редовни рокови за месечните исплати и, како што наведуваат, одговорност од Фондот за здравствено осигурување за доцнењата.
Фондот за здравствено осигурување и Владата засега не се произнесоа по наводите изнесени во соопштението на Левица.
