Градоначалникот на Кавадарци, Митко Јанчев, оствари средба со раководството и ракометарите на ГРК „Тиквеш 2014“, посветена на почетокот на новата сезона, тековните активности и идниот развој на ракометот и спортот во градот.
На средбата беше истакнат успехот на кавадаречкиот клуб, кој четврта година по ред ја претставува Македонија на европската сцена. Нов европски предизвик за „Тиквеш“ следува овој викенд, кога во рамките на ЕХФ Европскиот куп ќе ги одмери силите со освојувачот на Купот на Луксембург, екипата на „Handball Esch“.
Развојот на спортот и создавањето услови младите да спортуваат, да ги усовршуваат своите способности и да ги развиваат спортските таленти остануваат меѓу приоритетите на Општина Кавадарци.
Од раководството на клубот упатија благодарност до Општина Кавадарци и градоначалникот Јанчев за континуираната поддршка и придонесот во развојот на ракометот.
Како знак на внимание, на градоначалникот му беше подарен и новиот автентичен дрес на ГРК „Тиквеш 2014“, во пресрет на новите натпреварувачки и европски предизвици.
