Во Собранието денеска се очекува нова рунда разговори меѓу координаторите на пратеничките групи, со цел да се надминат разликите и да се постигне политички договор за измените на Изборниот законик.
Најголемото несогласување и понатаму се однесува на начинот на кој македонските државјани што живеат во странство ќе го остваруваат своето право на глас. Од ВМРО-ДПМНЕ остануваат на предлогот гласањето на дијаспората да се спроведува по пошта, при што правилата за неговата примена би биле утврдени со акт на Државната изборна комисија, најдоцна до 30 септември 2028 година. Од партијата порачуваат дека се отворени и за разговори околу можноста земјата да биде една изборна единица.
Во меѓувреме, Левица предлага државното финансирање за изборното рекламирање на партиите што имаат пратенички групи да биде ограничено на 10 проценти, а одлуките во Државната изборна комисија да се носат со консензус. Од ВМРО-ДПМНЕ сметаат дека овие предлози не се прифатливи.
Измените на Изборниот законик веќе се наоѓаат во собраниска процедура, но нивното разгледување е блокирано со околу 13.500 амандмани поднесени од СДСМ и Левица. Најмногу несогласувања предизвикува предлогот за електронско гласање на иселениците.
Од СДСМ велат дека не го оспоруваат правото на глас на дијаспората, но оценуваат дека електронското гласање не обезбедува доволно гаранции за сигурноста и интегритетот на изборниот процес. Од Левица, пак, најавуваат дека би го поддржале овој модел доколку бидат прифатени нивните барања за финансирањето на политичкото рекламирање.
Според информациите од досегашните работни состаноци, политичките партии веќе се доближиле до договор за распределбата на буџетските средства за изборните кампањи. Предлогот е 97 проценти од средствата да се распределуваат според бројот на освоените пратенички мандати, а преостанатите три проценти да им припаднат на партии и групи избирачи што немаат свои претставници во Собранието.
Доколку денешните разговори резултираат со политички договор, СДСМ и Левица најавија дека ќе ги повлечат поднесените амандмани, што би овозможило деблокирање на постапката за усвојување на измените. Новиот Изборен законик е една од клучните обврски што државата треба да ги исполни во рамките на реформската агенда.
