Шпанија од денеска влегува во третиот топлотен бран ова лето, а метеоролозите предупредуваат дека температурите во поголем дел од земјата ќе надминат 40 Целзиусови степени, додека во одделни подрачја се очекува да достигнат и до 45 степени.
Шпанската метеоролошка агенција (AEMET) соопшти дека екстремните горештини ќе бидат предизвикани од антициклон кој неколку дена ќе задржува сув и многу топол воздух од Северна Африка над земјата.
Според прогнозите, најкритичен ќе биде четврток, кога се очекува кулминација на топлотниот бран.
„Нивото на опасност ќе биде значително во најтоплиот дел од денот, особено за лицата кои работат или престојуваат на отворено, како и за ранливите категории граѓани“, предупреди AEMET.
Ова е третиот топлотен бран што ја погодува Шпанија од почетокот на летото. Првиот беше регистриран кон крајот на јуни, кога беа урнати температурни рекорди во повеќе европски земји, а вториот следуваше на почетокот на јули.
Од AEMET наведуваат дека земјата го бележи најтоплиот почеток на летото откако се водат мерења, односно од 1961 година. Просечната температура во периодот од 1 јуни до 15 јули изнесувала 24,5 степени, што е за 3,3 степени повисоко од просекот за периодот 1991–2020 година.
Научниците предупредуваат дека климатските промени предизвикани од човековата активност ги прават топлотните бранови почести, подолготрајни и поинтензивни, а со тоа се зголемува и ризикот од шумски пожари. Во пожарот што избувна во јули во шпанската покраина Алмерија загинаа 13 лица.
