Нов топлотен бран ја зафати Западна Европа, при што Франција и Холандија воведоа вонредни мерки и предупредувања поради екстремно високите температури, кои викендов локално ќе достигнат и до 40 Целзиусови степени.
Во Холандија е активиран националниот план за справување со горештините, а издадено е жолто предупредување за повеќе делови од земјата. Највисоки температури се очекуваат во јужните провинции, каде што живата во термометарот може да достигне до 34 степени.
Во Франција, метеоролошката служба прогласи црвен аларм во 24 департмани, вклучувајќи го и регионот Ил де Франс, додека во уште 56 департмани е на сила портокалово предупредување. Во Бордо и Рен се очекуваат температури до 39 степени, а во Париз до 36 степени.
Француските власти предупредуваат дека високите температури претставуваат ризик дури и за здрави лица, особено за спортисти и работници на отворено. Владата за првпат го активираше планот за вонредни состојби „Орсек – екстремни горештини“ во девет департмани на западот на земјата.
Од почетокот на топлотниот бран на 19 јуни, во Франција се регистрирани 131 давење, а здравствените власти претходно соопштија дека за време на јунскиот топлотен бран биле забележани над 2.000 дополнителни смртни случаи, најмногу кај лицата постари од 45 години.
Метеоролозите прогнозираат дека горештините ќе продолжат и во текот на следната седмица, со можност за локални невремиња и грмежи по продорот на посвеж воздух.
