Екстремните топлотни бранови годинава однеле илјадници животи во Германија и Велика Британија, покажуваат најновите податоци на здравствените институции во двете земји.
Според германскиот Институт „Роберт Кох“, до 19 јули во Германија биле регистрирани околу 9.800 смртни случаи поврзани со високите температури, што е највисок број за истиот период од 2016 година наваму.
Повеќе од 5.000 од овие случаи се поврзуваат со силниот топлотен бран во втората половина на јуни, кога температурите во многу делови од Германија достигнаа околу 40 Целзиусови степени.
Од Институтот посочуваат дека жештините ретко се директна причина за смрт, но во комбинација со хронични заболувања, како кардиоваскуларни, белодробни и бубрежни болести, значително го зголемуваат ризикот од фатален исход. Најпогодени се постарите лица.
Во меѓувреме, британската Агенција за здравствена безбедност (UKHSA) проценува дека за време на двата топлотни бранови во мај и јуни во Велика Британија биле регистрирани 2.877 смртни случаи поврзани со екстремните горештини.
Од нив, околу 753 случаи се поврзуваат со топлотниот бран кон крајот на мај, а уште 2.124 со екстремните температури во периодот од 21 до 28 јуни.
Британските здравствени власти предупредуваат дека, доколку летово продолжат нови топлотни бранови, земјата би можела да го забележи најголемиот број смртни случаи поврзани со жештините во својата историја.
Во двете земји се интензивираат повиците за поголеми инвестиции во системите за заштита од екстремни температури, особено во болниците, домовите за стари лица и другите установи каде престојуваат најранливите категории граѓани.
