Нова серија експлозии во Франкфурт: нападнати кафуле и наргиле-бар

Нова серија експлозии ја потресе областа на Франкфурт и Офенбах, откако во текот на ноќта две експлозивни направи биле активирани пред угостителски објекти во Франкфурт. Во нападите нема повредени, но причинета е значителна материјална штета.

Полицијата соопшти дека експлозиите се случиле околу 4:20 часот наутро. Едната направа експлодирала пред кафулето „Рио“ во населбата Норденд, на улицата „Бергер штрасе“, а другата пред наргиле-барот „Трут“ на улицата „Цајл“.

— реклама —

Двете згради претрпеле значителна штета, а скршени биле и повеќе прозорци. Експлозијата пред кафулето „Рио“ била толку силна што биле оштетени и блискиот угостителски објект, соседната филијала на „Шпаркасе“, како и најмалку едно паркирано возило. Детонацијата ги разбудила жителите во околината, но според досегашните информации нема повредени.

— реклама —

Кај наргиле-барот „Трут“ експлозивната направа исто така била активирана пред влезот. На фотографиите од местото се гледа сериозно оштетен влезен простор, а полицијата врши увид и ги утврдува околностите.

Станува збор за последните во серијата слични инциденти во регионот. Во понеделникот експлозија одекнала во близина на станбена зграда во франкфуртската населба Бокенхајм.

— реклама —

Претходно, во неделата рано наутро, експлозии биле регистрирани во населбата Заксенхаузен во Франкфурт и во Офенбах, каде што биле оштетени бар, кафуле и киоск. Во врска со нападот во Заксенхаузен бил уапсен 15-годишник, кому му бил одреден притвор.

Полицијата дел од експлозиите во регионот Рајна-Мајна ги поврзува со организиран криминал и со појавата позната како „насилство како услуга“. Станува збор за начин на кој тинејџери и помлади полнолетни лица целно се регрутираат за извршување вакви напади.

Во март годинава бил уапсен 20-годишен Холанѓанец, за кого постои сомнение дека учествувал во неколку претходни експлозии.