(Видео) Бран незадоволство ја зафати Европа: Нападнати полицајци во Германија, солзавец и гумени куршуми во Швајцарија, стотици уапсени во Франција

Незадоволството од високите трошоци за живот, станбената криза и проблемите во образованието изведе стотици илјади луѓе на улиците во пет европски земји – Франција, Германија, Швајцарија, Португалија и Албанија. Демонстрациите, предводени главно од млади, на повеќе места прераснаа во судири со полицијата.

Најмасовни протести имаше во Франција, каде што околу 320.000 луѓе излегоа на улиците. Полицијата уапси повеќе од 770 лица, а во Париз е отворена истрага по напад со запаливи направи врз полициски службеници. Дел од нив се здобиле со изгореници од втор степен.

— реклама —

— реклама —

Во Германија повеќе од 100.000 луѓе протестираа во над 30 градови, барајќи подобро образование и пониски животни трошоци. Во Франкфурт беа оштетени 17 продавници, пет од нив беа ограбени, а повеќе од 100 полицајци беа повредени. Уапсени се 54 лица.

Во Португалија протестите беа насочени против предложените законски измени за изнајмување станови, за кои демонстрантите сметаат дека ќе ја продлабочат станбената криза. Во Лисабон и Порто полицијата ги растера протестните кампови.

— реклама —

Во албанскиот главен град Тирана демонстрациите против корупцијата и економските проблеми завршија со судири, при што маскирани лица фрлале камења и запаливи направи кон полицијата.

— реклама —

Насилство имаше и во Швајцарија, каде што во Цирих и Базел се одржаа непријавени протести. Полицијата употреби водени топови, солзавец и гумени куршуми откако демонстрантите фрлале камења, шишиња и пиротехнички средства. Рушења и палење контејнери биле пријавени и во други делови од земјата.