Тајландската полиција откри нови детали од истрагата за смртоносниот напад во училиште во близина на Бангкок, во кој животот го загубија повеќе лица, а осомничениот 14-годишник извршил самоубиство.
Според досегашните наоди, тинејџерот на интернет следел содржини поврзани со насилство, а полицијата утврдила и дека подолг период покажувал интерес за начинот на употреба на огнено оружје.
„Според изјавите на сведоците, сторителот приближно една до две години покажувал интерес за проучување на употребата на огнено оружје“, изјавил заменик-началникот на покраинската полиција Аттапол Анусит.
Полицијата досега испитала 17 сведоци, а во ранецот на момчето бил пронајден нож. Како доказен материјал биле одземени и огнено оружје, чаури и неговиот личен компјутер.
Прегледот на компјутерот покажал дека тинејџерот на социјалните мрежи гледал насилни содржини. Сепак, полицијата засега нема докази дека претходно вежбал пукање.
Дополнително било утврдено дека минатата година учител му одзел воздушен пиштол од типот ББ, кој го донел во училиштето.
Во меѓувреме, Министерството за образование најави нови безбедносни протоколи во училиштата во следните три месеци. Мерките ќе опфатат процена на менталното здравје на учениците, упатување на ризични ученици кај стручни лица, вежби за итни ситуации, кампања против врсничко насилство и построги проверки за спречување внесување опасни предмети во училиштата.
Во нападот, покрај загинатите, биле повредени повеќе од 20 лица. Случајот повторно ја отвори дебатата за контролата на оружјето во Тајланд.
