Нови електронски сертификати за земјоделски производи и вино преку uslugi.gov.mk

Министерот за дигитална трансформација Стефан Андоновски денеска ги промовираше двете нови електронски услуги на Државниот инспекторат за земјоделство, кои отсега се достапни преку Националниот портал за услуги. Станува збор за услугите „Уверение за квалитет – сертификат за земјоделски производи, преработки и стоки“ и „Уверение за квалитет В1 – сертификат за извоз на вино“.

Според Андоновски, дигитализацијата на административните постапки ќе им овозможи на компаниите побрзо да ги добиваат потребните документи, со што ќе се намалат трошоците и ќе се подобри нивната конкурентност.

— реклама —

„За една компанија, времето потребно за добивање документ не е само административно прашање, туку директен трошок. Со новите електронски услуги ги поедноставуваме постапките и создаваме подобри услови за компаниите што произведуваат, извезуваат и ја движат македонската економија“, изјави Андоновски.

— реклама —

Новите услуги се наменети за земјоделските производители, преработувачите, винарниците и извозниците. Сертификатите, покрај во хартиена форма, ќе можат да се добиваат и електронски, со иста правна важност, што ќе ја елиминира потребата од лично подигнување на документите и ќе ја поедностави целата постапка.

Дигитализирано е и плаќањето на административните такси, кои отсега ќе може да се подмируваат електронски преку апликации за електронско банкарство, без користење хартиени уплатници.

— реклама —

Андоновски нагласи дека дигиталната трансформација придонесува и за поголема транспарентност, бидејќи дигиталните постапки оставаат јасна електронска трага, ги намалуваат можностите за субјективно одлучување и го ограничуваат непотребниот директен контакт меѓу институциите и корисниците.

— реклама —

Директорот на Државниот инспекторат за земјоделство, Ивица Ангеловски, истакна дека новите електронски услуги ќе обезбедат побрзи и поефикасни постапки за бизнис-заедницата, а компаниите полесно ќе ги добиваат потребните сертификати.

Проектот е реализиран во соработка меѓу Министерството за дигитална трансформација и Државниот инспекторат за земјоделство, со поддршка на Германското друштво за меѓународна соработка (GIZ). Во наредниот период, новите услуги ќе бидат презентирани и пред бизнис-заедницата во соработка со Стопанската комора на Македонија.