Уредувањето на паркот „Македонија“ 1, 2 и 3 во Карпош е во тек, а според градоначалникот на Општина Кисела Вода и кандидат за градоначалник на Скопје, Орце Ѓорѓиевски, целта е создавање почисти, побезбедни и поуредени зелени површини за сите граѓани.
„Парковите се белите дробови на градот. Таму децата растат, семејствата создаваат спомени, младите се дружат, а повозрасните наоѓаат мир, сенка и простор за одмор“, истакна Ѓорѓиевски.
Тој информираше дека во рамки на активностите се поставува нова урбана опрема, меѓу која клупи и корпи за отпадоци, а се уредуваат и летниковците кои секојдневно ги користат голем број посетители.
„Нашата обврска е парковите да бидат чисти, уредени, безбедни и достојни за сите посетители. Затоа редовно ги одржуваме зелените површини кои се под надлежност на Град Скопје, но истовремено упатувам апел до сите граѓани да ги чуваме парковите како свој дом“, порача тој.
Ѓорѓиевски нагласи дека во неговата програма е предвидена изградба на нови паркови и дополнителни зелени површини, со цел Скопје да добие повеќе простор за живот, рекреација и одмор.
„Да ги посетуваме нашите паркови, да уживаме во нив, но и да ги чуваме. Зеленилото е богатство кое им припаѓа на сите нас, но и на генерациите што доаѓаат по нас“, истакна Ѓорѓиевски.
