Најмалку 12 лица загинаа утрово во израелски напади врз Појасот Газа, меѓу кои најмалку четири лица кои беа убиени во израелски воздушен напад врз камп во кој се сместени раселените Палестинци во Деир ал Балах во центарот на Газа.
Најмалку осум лица, меѓу кои три деца, загинаа утринава во израелски напад врз куќа во северниот дел на Газа, соопшти Министерството за здравство на Газа под контрола на Хамас.
Утрово израелските сили нападнаа и шаторски камп во дворот на болницата Ал Акса во Деир ал Балах, а во тој напад се повредени неколку лица, соопштија здравствените власти, пренесе АП.
Болницата во Деир ал Балах е главната медицинска установа која работи во централниот дел на Појасот Газа, каде што се засолниле илјадници Палестинци кои избегале од конфликтот во другите делови на енклавата.
