Уште еден тежок руски ракетен напад го погоди Киев во текот на ноќта, при што животот го загубија најмалку 12 лица, а десетици други се повредени, соопшти градоначалникот на украинската престолнина, Виталиј Кличко.
Според украинското Министерство за внатрешни работи, погодени биле повеќе индустриски објекти и станбени подрачја во Киев и неговата околина. По нападот избиле пожари на повеќе локации, а дел од нив биле ставени под контрола во раните утрински часови.
Од Министерството наведоа дека на неколку места луѓе останале заробени во засолништа и станбени објекти поради оштетувањата и урнатините предизвикани од нападот.
Руското Министерство за одбрана потврди дека руските сили извршиле голем ноќен напад со оружје со долг дострел и беспилотни летала врз цели во Киев и поширокиот регион. Од Москва тврдат дека меѓу погодените цели биле производствени капацитети за беспилотни летала и ракети, складиште за муниција, логистички центар и складиште за гориво.
Нападот повторно го стави во фокус проблемот со украинската воздушна одбрана. На Киев му недостигаат пресретнувачки ракети за системите „Патриот“, кои се меѓу клучните средства за заштита од руските ракетни напади, додека дел од очекуваната помош од сојузниците доцни.
Украинскиот претседател Володимир Зеленски по нападот повторно ги повика партнерите да ги зголемат резервите на средства за воздушна одбрана.
„За жал, додека Москва инвестира во балистички ракети и ескалација, ваквите напади не секогаш добиваат одговор каков што треба од светот“, порача Зеленски.
Последиците од нападот се почувствувале и во железничкиот сообраќај. Украинската државна железничка компанија соопшти дека биле активирани итни безбедносни протоколи, а дел од возовите биле пренасочени за да се избегнат оштетените делови од железничката мрежа.
Сирените за воздушен напад се огласувале низ Украина од полноќ, додека противвоздушната одбрана предупредувала на различни ракетни и беспилотни закани.
