Новите автомобили во ЕУ добиваат камера што го следи вниманието на возачот

Купувањето нов автомобил во Европската Унија отсега носи и нови задолжителни безбедносни технологии. Од 7 јули, сите нови патнички автомобили и лесни комерцијални возила што првпат се регистрираат во земјите членки мора да бидат опремени со системи што треба да придонесат за поголема безбедност во сообраќајот.

— реклама —

Најголемо внимание привлече системот за предупредување при одвлекување на вниманието на возачот (ADDW), кој со помош на инфрацрвена камера ја следи насоката на погледот и положбата на главата на возачот.

Доколку системот утврди дека возачот предолго не гледа кон патот, на пример поради користење мобилен телефон или гледање во мултимедијалниот екран, се активира звучно или визуелно предупредување со цел вниманието повторно да се насочи кон возењето.

— реклама —

Според европските правила, камерата не служи за снимање или зачувување видеоматеријали. Нејзината единствена функција е во реално време да го анализира вниманието на возачот и, доколку е потребно, да испрати предупредување.

— реклама —

Покрај овој систем, новите возила ќе мора да бидат опремени и со дополнителни безбедносни технологии, меѓу кои подобрен систем за автоматско сопирање што подобро препознава пешаци и велосипедисти, подобрена заштита на пешаците при судир, подобра прегледност од возилото и нови стандарди за безбедност на гумите.

Новите барања се однесуваат исклучиво на возилата што првпат се регистрираат по стапувањето во сила на прописите. Сопствениците на веќе регистрирани автомобили нема да имаат обврска дополнително да ги вградуваат овие системи.

Од Европската комисија се очекува новите безбедносни стандарди значително да придонесат за намалување на бројот на сообраќајни несреќи, особено оние предизвикани од користење мобилен телефон, замор и губење на концентрацијата зад воланот.