По пронаоѓањето на телото на 42-годишен жител на Тетово, кој претходно бил пријавен за исчезнат, надлежните институции отворија истрага за утврдување на околностите околу случајот.
Од Јавното обвинителство соопштија дека на местото на настанот бил извршен увид и дека се преземаат сите потребни мерки за расчистување на случајот и идентификација на можна сторителска одговорност.
„Извршен е увид на лице место, дадени се повеќе насоки и наредби со цел откривање на сторителите поради сомненија дека смртта е резултат на кривично дело. Дадена е наредба за обдукција, наредба за подигање на возилото и други траги од лице место на кои ќе се врши вештачење, наредба за обезбедување на снимки од видео надзор, како и други докази,“ соопштија од Обвинителството.
Оттаму додаваат дека по наредбите веќе се постапува, а истрагата продолжува во насока на утврдување на мотивите и можните сторители.
