Охридскиот Регион има реални шанси да го задржи статусот на светско природно и културно наследство на УНЕСКО и да не биде впишан на листата на светски наследства во опасност, оцени вицепремиерот и министер за транспорт Александар Николоски.
Тој, при денешната посета на Тетово, изјави дека повеќе детали се очекуваат по Генералното собрание на УНЕСКО, кое следната недела ќе се одржи во Јужна Кореја.
„Не би сакал однапред да прогнозирам, но верувам дека ќе успееме да го избегнеме најнеповолниот исход, односно Охридскиот Регион да биде прогласен за загрозено подрачје“, рече Николоски.
Според него, ваквиот оптимизам произлегува од разговорите со претставниците на реактивната мисија на УНЕСКО, која неодамна престојуваше во земјава, како и од посетата на повеќе од десет амбасадори на држави членки на организацијата, кои учествуваат во процесот на одлучување.
Осврнувајќи се на изградбата на автопатот Требеништа – Ќафасан, Николоски истакна дека по разговорите со мисијата на УНЕСКО повеќе не се доведува во прашање реализацијата на проектот.
„Денес веќе не се разговара дали автопатот ќе се гради, туку која траса е најсоодветна. Пред посетата на мисијата постоеја идеи проектот целосно да се стопира, но сега останува да се избере најдобрата варијанта на трасата“, изјави тој.
Минатата година Комитетот за светско наследство на УНЕСКО го одложи впишувањето на Охридскиот Регион на Листата на светски наследства во опасност и им остави дополнително време на Македонија и Албанија да ги исполнат препораките од претходните мониторинг-мисии.
Во февруари годинава владина делегација, предводена од Николоски, престојуваше во Париз на средби со раководството на УНЕСКО, каде што беа презентирани активностите што државата ги спроведува за зачувување на природното и културното наследство на Охридскиот Регион.
