Од 1 август туристите ќе можат навечер да ги посетуваат најпознатите знаменитости во Италија

Од 1 август, најпознатите историски знаменитости во Рим и Милано ќе работат до доцна навечер, со цел посетителите полесно да ги разгледуваат за време на летните горештини.

— реклама —

Мерката е дел од заеднички проект на италијанските министерства за култура и туризам, чија цел е културното наследство да стане подостапно за туристите и граѓаните, особено во вечерните часови, кога температурите се пониски.

— реклама —

Продолженото работно време ќе важи за знаменитости како Колосеумот, Пантеонот и замокот на семејството Сфорца во Милано.

Министерот за култура, Алесандро Џули, оцени дека вечерните посети на Колосеумот и Пантеонот ќе им овозможат на посетителите да ги доживеат овие историски споменици во посебна атмосфера што ја доловува нивната историска вредност. Според него, поголемата достапност ќе придонесе за подобро запознавање со културното наследство и за поголема свест за неговото значење.

— реклама —

Министерот за туризам, Џанмарко Маци, истакна дека иницијативата произлегла од разговори со туристички водичи и претставници од туристичкиот сектор, со цел подобро да се одговори на потребите на посетителите.

Тој нагласи дека културниот туризам станал главен мотив за патување во Италија, откако од седмо место се искачил на првото во изминатата деценија, според податоците на Националниот институт за истражување на туризмот. Додаде дека токму затоа државата посветува посебно внимание на развојот на овој сегмент, кој веќе придонесува со околу 58 милијарди евра за националната економија.