Од девет на три жртви: Тошковски ги посочи резултатите од „Безбеден град“

Министерот за внатрешни работи Панче Тошковски денеска во Тетово оствари средба со ректорот и раководството на Државниот универзитет во Тетово, а потоа го посети и Секторот за внатрешни работи Тетово, каде разговараше за безбедносната состојба, актуелните предизвици и резултатите од работата.

— реклама —

На средбата со раководството на Универзитетот било разговарано за продлабочување на соработката со Министерството за внатрешни работи, особено преку создавање можности најдобрите студенти од студиските програми за кои има потреба МВР, по завршувањето на образованието, своето знаење и стручност да ги стават во служба на институциите и безбедноста на граѓаните.

— реклама —

При посетата на СВР Тетово било оценето дека безбедносната состојба е стабилна, а посебно внимание било посветено на резултатите во сообраќајната безбедност.

Тетово е меѓу градовите каде што веќе се применува системот „Безбеден град“. Според податоците за првите осум месеци од годинава, на подрачјето на СВР Тетово во сообраќајни незгоди животот го загубиле три лица, додека во истиот период минатата година бројот на жртви бил девет. Намален е и вкупниот број на сообраќајни незгоди.

— реклама —

„Ова се резултати што најдобро говорат за придобивките од системот. Кога зборуваме за „Безбеден град“, не зборуваме само за санкционирање на прекршоците, туку пред сè за менување на сообраќајните навики, побезбедни улици и спасување човечки животи“, нагласи Тошковски.

— реклама —

Министерот најави дека за неколку дена системот „Безбеден град“ ќе започне да се применува и на подрачјето на СВР Велес, по што постепено ќе биде проширен и во останатите сектори за внатрешни работи во државата.