Од домашни реформи кон европско здравство: Македонија пристапува кон EU4Health

Приклучувањето на Македонија кон програмата EU4Health на 24 јуни во Брисел ќе претставува значаен исчекор во интеграцијата на домашниот здравствен систем во европските здравствени политики и механизми за поддршка. Според министерот за здравство Азир Алиу, овој чекор е потврда дека реформите во здравството добиваат поширока европска димензија и отвораат нови перспективи за институциите и граѓаните.

— реклама —

„Ова е отворање на европска здравствена врата за нашите институции, здравствени установи, академската заедница, професионалните организации и пациентските здруженија. Ако првата година од мандатот беше година на поставување правец, втората ќе биде година на користење на можностите на EU4Health и активно учество во европските здравствени процеси“, рече Алиу на денешниот брифинг со медиумите.

— реклама —

Програмата EU4Health располага со оперативен буџет од 4,4 милијарди евра за периодот 2021–2027 година и овозможува учество во европски повици, грантови, јавни набавки, заеднички акции и партнерства.

— реклама —

Министерот нагласи дека најголемата вредност на програмата не е само финансиската поддршка, туку пристапот до европски стандарди, експертиза и мрежи на соработка. Според него, се отвораат можности за проекти во областа на дигиталното здравство, European Health Data Space, превенцијата, скрининг-програмите, менталното здравје, подготвеноста за кризни состојби, пристапот до лекови и јакнењето на здравствениот кадар.

Алиу посочи дека искуството од пандемијата покажало оти ниту една држава не може самостојно да одговори на сите здравствени ризици, поради што EU4Health претставува важен чекор кон поголема здравствена безбедност заснована на европска солидарност, координација и заеднички ресурси.