Вкупно 1.696 пожари на отворен простор биле регистрирани во Македонија во периодот од 1 јуни до 31 август 2026 година, информира Центарот за управување со кризи.
Од нив, 69 биле шумски пожари, додека најголемиот дел, односно 1.627, биле регистрирани на висока сува трева, стрништа, нискостеблеста деградирана шума и места со отпад, односно депонии.
Во текот на целиот период ЦУК ја следел состојбата со пожарите и ја координирал работата на надлежните институции и расположливите ресурси, со цел навремено гаснење, спречување на ширењето на огнот и заштита на населението и материјалните добра.
Директорот на ЦУК, Мухамед Али, упати апел до граѓаните да бидат особено внимателни и одговорни и доследно да ги почитуваат мерките за заштита од пожари.
Од ЦУК потсетуваат да не се пали оган на отворен простор и да не се фрлаат отпушоци или запалив отпад во природата. Секое забележано чадење или пожар треба веднаш да се пријави на единствениот број за итни случаи 112.
