Државната комисија за спречување на корупцијата (ДКСК) отвори предмет за работењето на Институтот за јавно здравје (ИЈЗ), откако ревизорскиот извештај за 2024 година откри низа сериозни неправилности во финансиското и организациското работење на установата.
Од Антикорупциската комисија информираат дека постапката е отворена по сопствена иницијатива, а предмет на проверка ќе бидат наводите за можна корупција, злоупотреба на службената положба, судир на интереси и други незаконски постапки.
Одлуката за отворање на предметот била донесена на денешниот колегиум на Комисијата, при што најавено е прибирање документација и информации од повеќе институции за целосно утврдување на фактичката состојба.
Актуелната директорка на ИЈЗ, Марија Андоновска, неодамна јавно ги презентираше наодите што ги затекнала по преземањето на функцијата. Според неа, биле откриени бројни спорни случаи, меѓу кои недостиг на реагенси и нивна неевидентирана потрошувачка, лица кои примале плата без да доаѓаат на работа, лажно евидентирање присуство, вработувања без положен административен испит, неправилни унапредувања и исплата на различни додатоци на плата без соодветна законска основа.
Особено загрижувачки се наводите дека фармацевтски техничари извршувале задачи на медицински сестри и лаборанти, како и склучувањето договори на дело со лица кои веќе биле редовно вработени во институцијата.
Меѓу спорните случаи е и издавањето деловен простор во сопственост на Институтот на приватна пекарница, како и спроведувањето јавни набавки кои не биле предвидени во годишниот план за работа.
Андоновска откри и дека на дел од вработените им биле исплаќани дополнителни месечни надоместоци од 44.000 до 88.000 денари за различни административни и технички активности.
Во јавноста посебно внимание привлече информацијата за интернет-кабел во должина од 15 километри, набавен за околу 15.000 евра, за кој, според директорката, нема податок каде се наоѓа и дали воопшто бил искористен. Дополнително, за одбележувањето на 100-годишнината на Институтот биле потрошени околу 50.000 евра за настан што траел само еден час.
Ревизорскиот извештај содржи негативно мислење за дел од финансиското работење на ИЈЗ и нотира слабости во финансиското управување, јавните набавки, евиденцијата на медицинскиот материјал, ангажирањето лица по договор на дело и спроведувањето на законските обврски.
Директорката Андоновска изјави дека очекува и Јавното обвинителство да ги разгледа наодите и да утврди дали постојат основи за кривична одговорност. Со отворањето на предметот од страна на ДКСК, случајот добива дополнителна институционална тежина и може да прерасне во една од најголемите истраги поврзани со работењето на јавна здравствена установа во последните години.
