Високите температури можат значително да го нарушат квалитетот на сонот, особено во текот на ноќта кога телото потешко се разладува. Од Институтот за јавно здравје посочуваат дека недоволниот и неквалитетен сон може да доведе до замор, намалена концентрација и отежнато функционирање во текот на следниот ден.
За полесно заспивање, ИЈЗ препорачува спалната соба да биде пријатно разладена. Доколку се користи клима-уред, препораката е температурата да се одржува на околу 25 степени Целзиусови, без прекумерно разладување.
Просторијата треба да се проветрува во вечерните, ноќните и раните утрински часови, кога надворешниот воздух е посвеж. Кога температурата надвор е повисока од онаа во просторијата, прозорците треба да останат затворени. Во текот на денот, прозорците изложени на директна сончева светлина треба да се засенчат со ролетни, кепенци или завеси.
ИЈЗ препорачува да се исклучат и непотребните светла и електрични уреди, бидејќи дополнително ја загреваат просторијата. Дрвјата и зеленилото околу домот, пак, обезбедуваат природна сенка и можат да придонесат за намалување на загревањето.
За спиење во топлите ноќи се препорачува лесна и широка облека, по можност од памук или други природни материјали. Истото важи и за постелнината – наместо дебели прекривки, подобро е да се користи тенок чаршаф и постелнина што овозможува циркулација на воздухот.
Пред спиење може да помогне и туширање со млака вода. Доколку тоа не е возможно, може да се измијат лицето, вратот, рацете и нозете со ладна или млака вода.
Особено важно е да се внесува доволно течност во текот на денот, а вода да има и во близина во текот на ноќта.
ИЈЗ советува да се избегнуваат обилни оброци непосредно пред легнување. Последниот поголем оброк треба да биде два до четири часа пред спиење, додека навечер треба да се избегнува тешко сварлива храна.
Алкохолот треба да се избегнува, а внесот на кофеин да се ограничи, особено во шесте часа пред спиење. Кофеинот може да го отежне заспивањето и да влијае врз квалитетот и времетраењето на сонот.
За подобар сон се препорачува просторијата да биде затемнета и тивка, а употребата на електронски уреди пред спиење да се намали. Исто така, важно е да се задржи редовен ритам на спиење, односно легнувањето и станувањето да бидат во приближно исто време и во периодите на високи температури.
Од ИЈЗ потсетуваат и дека граѓаните треба да ги следат официјалните информации и препораки за топлотните бранови и да ги приспособат секојдневните активности на временските услови.
Пријатно разладена спална соба, доволна хидратација и редовен ритам на спиење можат да помогнат организмот полесно да се одмори и закрепне за време на топлите периоди.
