По повод Меѓународниот ден на мирот, одбележани се 15 години од спроведувањето и развивањето на мировното образование во училиштата, во соработка со Првата детска амбасада „Меѓаши“.
На одбележувањето државниот секретар во Министерството за образование и наука Елена Ивановска истакна дека искуствата од минатото покажуваат оти конфликтите носат болка и загуби, поради што мирот треба да се гради и да се негува уште од најрана возраст.
Во изминатите 15 години, бројни наставници поминале обуки и во училиштата реализирале содржини насочени кон ненасилно решавање конфликти, прифаќање на различностите, дијалог, толеранција и соработка.
Ивановска посочи дека доколку децата уште од мали учат несогласувањата да ги решаваат преку разговор, слушање и компромис, да ги контролираат своите емоции и да ги почитуваат ставовите на другите, тие ќе израснат во граѓани кои ја негуваат културата на мирот.
Таа изрази благодарност до „Меѓаши“ за нивниот ангажман и ги повика сите чинители да придонесат кон создавање образование што ќе помогне во развојот на современо и демократско општество.
За придонесот во мировното образование признанија добија средните училишта „Ванчо Прке“ од Виница и „Зеф Љуш Марку“ од Скопје.
Ивановска нагласи дека наставниците имаат значајна улога стекнатото знаење да го пренесат во училниците, а најголемата вредност од нивната работа се учениците кои растат во духот на почитта, толеранцијата и одговорноста за мирна иднина на Македонија.
