Онкологија по вчерашното невреме: Нема радијација, пациентите се безбедни и третманите продолжија без прекин

Универзитетската клиника за радиотерапија и онкологија соопшти дека нема опасност за пациентите и медицинскиот персонал, откако во јавноста беа изнесени тврдења за наводен радијациски ризик и поплава по вчерашното невреме во Скопје.

— реклама —

Од Клиниката информираат дека обилните врнежи предизвикале протекување на вода во делот каде што е сместен Одделот за радиотерапија. Како мерка на претпазливост, апаратите за радиотерапија биле привремено исклучени, по што биле извршени сите потребни проверки.

— реклама —

По отстранувањето на проблемот, просториите биле исчистени и дезинфицирани, а овластени лица извршиле технички преглед на апаратите. Според Клиниката, не биле утврдени никакви оштетувања или неисправности, по што радиотерапевтските третмани продолжиле без прекин.

Во врска со просторијата во која се спроведува терапија со радиоактивен јод, од Онкологија велат дека поради забележаното протекување пациентите веднаш биле преместени во друга соодветна просторија во рамките на установата.

— реклама —

Во координација со Институтот за нуклеарна медицина и Дирекцијата за радијациона сигурност биле спроведени детални мерења, кои покажале дека нема радиоактивна контаминација.

Од Клиниката потенцираат дека ситуацијата е целосно стабилизирана и дека здравствените услуги се одвиваат непречено, без да биде доведена во прашање безбедноста на пациентите.