Бојана Стојчевска преку објава на социјалните мрежи упати критики за состојбата во здравствениот систем, осврнувајќи се на искуствата на онколошките пациенти кои, како што наведува, со месеци чекаат за дијагностички резултати, прегледи и терапија.
Таа посочува дека пациентите по повеќемесечни терапии чекаат дополнителни месеци за компјутерска томографија и за извештај од снимањето, а во меѓувреме доаѓаат на контроли без конечни резултати. Според неа, лекарите се преоптоварени со голем број пациенти, што дополнително го усложнува процесот.
Стојчевска наведува дека по прегледите следуваат нови чекања за административни процедури и за подигнување на терапијата, а дел од пациентите се соочуваат и со недостиг од лекови.
„За еден онколошки пациент времето не се брои во денови. Се брои во шанси. Во секој изгубен ден, во секоја пропуштена терапија, во секој месец чекање“, пишува Стојчевска.
Во објавата таа нагласува дека вината не е кај лекарите или пациентите, туку кај системот, повикувајќи ги носителите на одлуки лично да ја видат состојбата во чекалните на Клиниката за онкологија.
„Ако ова е реалноста на едно општество, тогаш најголемата дијагноза не ја носат пациентите. Ја носи системот“, наведува Стојчевска.
