Виктор Орбан нема да присуствува на неформалниот самит на лидерите на Европската Унија кој следната недела ќе се одржи во Никозија, потврдија повеќе извори од ЕУ.
Орбан, кој по парламентарните избори претрпе тежок пораз, останува на функцијата до мај, кога новоизбраниот победник Петер Маѓар треба да ја преземе премиерската должност.
Според дипломатски извори, во Брисел повеќе не се очекува неговото доаѓање на состанокот на Кипар. Вообичаена практика во ЕУ е на последниот самит да им се оддаде почит на лидерите кои заминуваат и да им се врачи симболичен подарок, но овојпат тоа нема да се случи со Орбан. Засега не е познато дали Унгарија ќе биде претставена од друг функционер, иако во минатото словачкиот премиер Роберт Фицо понекогаш го заменувал на вакви состаноци.
Орбан до неодамна беше најдолговечен член на Европскиот совет, учествувајќи на самити од 2010 година. Неговиот последен самит беше во март, кога беше критикуван поради неговото вето на пакетот од 90 милијарди евра за Украина.
Претседателот на Европскиот совет, Антонио Кошта, тогаш остро го критикуваше Орбан, истакнувајќи дека договорите постигнати меѓу 27-те членки мора да се почитуваат и дека ниту една земја не може да го блокира процесот. Тој додаде дека „никој не може да ја уценува Европската Унија“.
Победникот на изборите Петер Маѓар претходно го повика Орбан да го укине ветото пред да ја напушти функцијата.
