Унгарскиот премиер и лидер на Фидес, Виктор Орбан, порача дека задачата на партијата е да биде подготвена за да може Унгарија да смета на неа секогаш кога ќе биде потребно. Тој ова го изјави на партискиот собир во југозападниот дел на земјата.
На годишниот собир на Фидес и Христијанско-демократската народна партија, Орбан оцени дека Унгарија зад себе има „16 фантастични години“ на граѓанско и патриотско владеење.
Според него, кога Фидес дошол на власт во 2010 година, Унгарија била во состојба налик на колонија, но владата, предводена од него, успеала да ја претвори во „независна, суверена и успешна земја“.
„Фидес победи на четири последователни изборни циклуси пред да загуби едни избори по 20 години“, изјави Орбан, пренесе унгарската новинска агенција МТИ.
Тој најави дека Фидес следниот четврток и петок ќе одржи дводневен состанок на раководството. Една од главните теми ќе биде распределбата на средства за поддршка на граѓани, медиуми, влијателни лица и поединци кои учествуваат во, како што го нарече Орбан, „националниот отпор“.
Говорејќи за миграциската политика, Орбан рече дека Унгарија во изминатата деценија ја штитела Европа и соседните земји.
Тој оцени дека токму „одбраната на надворешните граници на Европа“ од страна на Унгарија е причината што во Чешка и Словачка немало миграција, додека во Австрија таа била во многу ограничен обем.
Орбан најави и дека утре ќе даде интервју во кое ќе говори за говорот што допрва треба да го одржи на собир затворен за јавноста.
