Основната каматна стапка останува 4,25%

Народната банка одлучи основната каматна стапка да остане на 4,25 проценти, оценувајќи дека високата неизвесност во домашното и меѓународното окружување бара внимателен пристап кон монетарната политика.

Одлуката е донесена на редовната седница на Извршниот одбор, одржана на 15 септември 2026 година, врз основа на најновите макроекономски показатели и проценки за ризиците.

— реклама —

Од Народната банка посочуваат дека движењата на девизниот пазар се стабилни. Во јули и август, централната банка интервенирала со откуп на девизи, но и натаму се забележува повисока побарувачка од корпоративниот сектор, делумно поради повисоките цени на енергентите. Девизните резерви на крајот на август изнесувале 5.101 милион евра, обезбедувајќи покриеност на увозот на стоки и услуги од 4,5 месеци.

— реклама —

Инфлацијата во август изнесувала 2,6 проценти, наспроти 2,3 проценти во јули. Од Народната банка велат дека растот на светските цени на енергентите веќе се одразува врз домашните цени, додека високата променливост на увозните цени создава ризици за идната динамика на инфлацијата.

Особена неизвесност, според Извршниот одбор, носат натамошното заострување на воените дејствија на Блискиот Исток и војната меѓу Русија и Украина. Овие случувања повторно ги зголемија цените на нафтата и другите енергенти и предизвикаа нарушувања во синџирите на снабдување, што може да има дополнителни последици врз девизниот пазар и домашните цени.

— реклама —

И покрај неповолното надворешно окружување, домашната економија останува отпорна. Во вториот квартал од 2026 година, реалниот годишен раст на БДП достигнал 4,3 проценти, што е над априлската проекција. Растот во значителен дел се должи на бруто-инвестициите, особено на градежните активности поврзани со големите инфраструктурни проекти.

— реклама —

Народната банка оценува дека задржувањето на основната каматна стапка, заедно со досегашните мерки во задолжителната резерва и макропрудентната политика, ќе придонесе за стабилност на денарот во однос на еврото, стабилизирање на инфлацијата и зацврстување на инфлациските очекувања.

Централната банка најавува дека и натаму внимателно ќе ги следи домашните и меѓународните економски и финансиски движења и, доколку биде потребно, ќе ги употреби расположливите инструменти за зачувување на макроекономската и финансиската стабилност.