Осум земји во Истанбул разговараа за повторно отворање на Ормускиот Теснец

Министрите за надворешни работи на осум европски и блискоисточни земји се состанаа во Истанбул, каде што разговараа за повторно отворање на Ормускиот Теснец и за кризите на Блискиот Исток. На состанокот учествуваа претставници на Велика Британија, Франција, Германија, Италија, Саудиска Арабија, Египет, Пакистан и Турција.

Разговорите биле посветени на израелско-палестинскиот судир, состојбата во Јемен, безбедноста на пловидбата низ Ормускиот Теснец и можностите за завршување на војната меѓу Русија и Украина, соопшти германското Министерство за надворешни работи.

— реклама —

Германскиот министер Јохан Вадефул изјави дека осумте земји испраќаат заедничка порака дека нема да прифатат Иран и Хутите да ја загрозуваат светската трговија и да го попречуваат глобалното снабдување со енергенси и ѓубрива. Тој повика да престанат нападите врз слободата на пловидба и соседните земји, нагласувајќи дека Германија ја поддржува поморската безбедност и учествува во операцијата на ЕУ „АСПИДЕС“, која ги штити трговските бродови во Црвеното Море и Аденскиот Залив.

Вадефул додаде дека Германија, Франција и Велика Британија се подготвени да преговараат со Иран со цел да се спречи земјата да се здобие со нуклеарно оружје. Тој повика и на поддршка за Саудиска Арабија и Јемен, за да можат да се одбранат и да се создадат услови за продолжување на конкретните преговори со Хутите.

— реклама —

Францускиот министер за надворешни работи, Жан-Ноел Баро, предупреди дека нова ескалација меѓу Иран и САД би имала сериозни последици врз цените на јаглеводородите. Тој најави дека првиот чекор на осумте земји ќе биде повик до двете страни да покажат максимална воздржаност, со цел да се избегне ново заострување на состојбата во регионот.

— реклама —

Италијанскиот министер Антонио Тајани истакна дека целта е да се намалат тензиите и да се гарантира слободата на пловидба. Според него, проблемот не може да се реши исклучиво со воени средства, туку се потребни дијалог и јасна порака до Иран дека сегашниот пристап не може да продолжи.

Домаќин на состанокот беше турскиот министер за надворешни работи Хакан Фидан, во период кога Турција ги засилува напорите за зајакнување на својата улога во регионот. Меѓу нив е и Одбранбениот сојуз од Мека, договор што Турција, Саудиска Арабија и Пакистан го покренаа во август.

Турските власти наведуваат дека сојузот не е насочен против ниту една конкретна земја и дека е отворен за пристапување на други држави, меѓу кои и Египет. Каиро сè уште нема донесено одлука дали ќе му се приклучи. Египетскиот претседател Абдел Фатах ел Сиси изјави дека неговата земја ќе ја брани територијата на Саудиска Арабија, но нема да учествува во напади врз Јемен.

Пред состанокот, од кабинетот на британскиот министер за надворешни работи Ед Милибанд соопштија дека главни теми ќе бидат Ормускиот Теснец и состојбата во Саудиска Арабија. По разговорите, Баро изјави дека осумте земји се договориле да ја продолжат соработката и редовно да одржуваат состаноци.