По информациите дека Здружението за заштита на авторски музички права (ЗАМП) бара надомест од издавачите на сместувачки капацитети во Охрид, со остра и саркастична реакција се огласи Ина Многуфина.
Таа ја исмеа логиката, како што наведува, според која туристите најголемиот дел од времето го поминуваат во апартманите слушајќи музика.
„Охрид. 2026. Главен туристички центар во земјата која е во топ пет по раст во Европа. Дознале ЗАМП дека во Охрид одат луѓе и јас тука си го замислувам состанокот каде веројатно си рекле: аха, во Охрид одат луѓе. Се сместуваат во апартмани, ахааа. Па што прават таму? Сигурно се собираат во сместувачките капацитети и си пуштаат музика, ги учат нашите песни, пеат рефрени“, напиша Многуфина.
Таа иронично додава дека по таквата логика сопствениците на апартманите треба да платат 16.500 денари за периодот од 1 април до 30 септември.
„Треба да платат 16.500 денари за тоа што имале слушано музика од 1 април до 30 септември, во октомври може да слушаат без пари, ама на потивко“, наведува таа.
Во објавата посочува дека ваквата практика, според информациите што ги има, засега се применува само во Охрид.
„Ова е стигнато само за Охриѓани, колку што гледам. Во Дојран и Струга може да слушаат слободно, во Преспа нема ни кој да слуша“, пишува Многуфина.
Во продолжение таа ја проширува критиката и кон односот кон Охрид, наведувајќи дека градот и понатаму се соочува со нерешени еколошки проблеми.
„Воедно, во најстарото езеро во Европа сѐ уште се влеваат фекалии, пошто да се реши тој проблем во еден град во 2026 година е нуклеарна физика, веројатно. И откако ќе ги оптовариме овие што издаваат со трошоци и откако ќе го загадиме Охридско со дневни соби, гуми и сѐ останато, што ќе правиме, следен туристички центар? Прилеп? Кратово не може, Стојна не пушта“, стои во објавата.
