моб

Директорот на МОБ одговори за обвинувањата: Нема да дозволам нарушување на дисциплината

Директорот на НУ Национална опера и балет, Оливер Арсовски, со јавно соопштение реагираше на обвинувањата изнесени од вработената Татијана Петрушевска, оценувајќи ги како невистинити, паушални и штетни за угледот на институцијата.Арсовски посочи дека Националната опера и балет, како најголема културна институција во државата со над 500 вработени, мора да функционира врз основа на јасна хиерархија, прецизна поделба на одговорностите и доследно почитување на работната етика и дисциплина. Според него, во оркестарот постојат јасно утврдени улоги, што е суштински принцип за нормално функционирање на единствената оперска куќа во државата.Тој нагласи дека секое отстапување од воспоставениот систем директно влијае врз работата на целата институција и дека улогата на управата не е да зазема страни, туку да обезбеди ред, дисциплина и зачувување на уметничките стандарди. Во таа насока, Арсовски истакна дека нема да дозволи нарушување на работните процеси, ниту непочитување на редот, дисциплината и хиерархијата во оркестарот, каде диригентот има улога на водечки авторитет.„Нема да дозволам лични нетрпеливости на поединци да се манифестираат преку непочитување кон колегите и кон странските соработници, со кои со години заеднички работиме на квалитетни продукции за нашата публика“, наведува Арсовски.Тој додаде дека институцијата и понатаму ќе постапува согласно своите интерни правилници и во законската рамка, со цел заштита на колективот, публиката и интегритетот на оперската и балетската уметност. Воедно, упати апел до Синдикатот на културата да не подлегнува на влијанија од поединци кои, како што наведува, ја злоупотребуваат неговата улога, туку да продолжи да се залага за правата на колективот и достоинството на институциите.Во однос на конкретниот случај, Арсовски истакна дека поради тоа што е во тек дисциплинска постапка, нема да изнесува факти во јавноста. Сепак, нагласи дека постојат изјави од вработени, како и изјава од диригентот на претставата, врз основа на кои е донесен предлог за покренување дисциплинска постапка и решение за суспензија, согласно Законот за култура.Тој ги отфрли тврдењата дека против Петрушевска претходно не биле водени постапки, наведувајќи дека во повеќе наврати вработени од оркестарот побарале заштита од нејзиното однесување.

Македонија | пред 10 часа

Првата обоистка од МОБ: 30 години служам на МОБ, а денес сум жртва на тортура и мобинг

Татијана Петрушевска, прва обоистка на оркестарот на Национална опера и балет, каде што работи повеќе од 30 години, јавно обвини за системски притисоци, мобинг и незаконски постапки врз уметниците и вработените во институцијата, посочувајќи дека состојбата кулминирала по доаѓањето на директорот Оливер Арсовски.Петрушевска изјави дека преку поддршка од Синдикатот на културата, таа и нејзини колеги писмено се обратиле до министерот за култура со барање за итна заштита од, како што наведе, континуирани притисоци, уцени и закани, особено кон жените уметници.„Како уметник, 30 години безпрекорно ја извршувам својата работа. Но, во последната година јас и моите колеги сме изложени на тортура. Сето тоа кулминираше со забрана за мој влез во МОБ и со казна од 50 проценти намалување на платата во наредните шест месеци. Тоа е спротивно на процедурите и надвор од ингеренциите на директорот, кој сам не може да донесува такви одлуки“, изјави Петрушевска.Според неа, ваквите одлуки се доказ за насилнички однос и обид за демонстрација на надмоќ. Таа посочи дека уште од првиот момент кога притисоците кулминирале, во нејзина заштита застанале првите инструменталисти на оркестарот, со цел да се смири тензијата, но, како што рече, диригентот, инструиран од директорот, продолжил со заканите.„На состанок беше кажано дека додека е жив нема да престане да ме гони мене – жена, обоист и докажан уметник. Закани добиваа и колегите кои застанаа во моја одбрана. Со највулгарен речник ни се обраќаат секојдневно. Денес, 15 години по првото директорување на Арсовски, сценариото се повторува. Јас, како жена и прв обоист, бев избрана за мета на мобинг“, рече Петрушевска.Таа побара од Министерство за култура итно да преземе мерки и да обезбеди заштита за неа и за сите колеги и колешки кои, како што наведе, се изложени на секојдневен мобинг. Воедно изрази сомнеж дека министерот ќе реагира соодветно, имајќи ја предвид, како што рече, нивната соработка од 2016 година.„Ќе го повикам и премиерот итно да ја истражи состојбата во МОБ, која не е само институционално, туку и меѓучовечки целосно девастирана“, додаде Татијана Петрушевска.

Македонија | пред 12 часа

Балетската претстава „Ана Каренина“ вечерва во МОБ

Во Националната опера и балет (НОБ) вечер и на 26 јуни ќе биде изведена балетската претстава во два чина „Ана Каренина“, со избрана музика од Петар Илич Чајковски.-Преку современите кореографски решенија сoединети со класичен балет на Лео Мујиќ од Хрватска, минималистичката, но ефектна сценографија, прекрасните костими на Александар Ношпал, ќе видиме едно интересно визуелно, динамично и полно со страст балетско видување на познатиот роман „Ана Каренина“ на големиот руски писател Толстој, соопштија од НОБ.Како што посочуваат, во повеќе од два часа, балетските уметници од Националната опера и балет со впечатливиот, емотивниот до исцрпување танц и инспиративните движења ќе ги пренесат сите емоции кои го означуваат ова дело: љубов, страст, омраза, лутина, гнев, љубомора, тага, мајчинска болка…Во главните улоги ќе настапат Мими Поп Алексова Атанасовскa, Марија Кичевска Шокаровска, Бобан Ковачевски (Балаж Лочеи, Унгарија), Гиљерме Алвез (Португалија).Настапуваат истакнати солисти и целиот балетски ансамбл на Националната опера и балет.

Магазин | пред 2 години

„Госпоѓиците од Авињон“ вечерва во МОБ

На сцената на Македонската опера и балет денеска ќе биде изведена балетската претстава „Госпоѓиците од Авињон“. Балет во девет слики.Балетската претстава „Госпоѓиците од Авињон“ е инспирирана од истоимената слика на уметникот Пабло Пикасо, зборува за пет жени и нивниот живот, нивната потрага по љубовта, смртта и слободата.Музиката во претставата е на Калиопи Букле, за кореографија и режија задолжена е Олга Панго. Либрето и драматургија се на Сашо Димоски, костимограф е Раде Василев, а на мултимедија и дизајн работеше Емил Петров, дизајн на светло – Милчо Александров, а дизајн на шминкa – Златица Поповска. Асистенти на кореографот се Горан Божинов и Саша Евтимова Користени се сценографски елементи од операта „Змејовата невеста“ – сценограф Валентин Светозарев.Настапуваат: Александра Мијалкова, Мими Поп-Алексова Атанасовска, Ивана Коцевска, Саша Евтимова, Христина Наќевска, Мирослав Митрашиновиќ, Балаж Лочеи, Агим Бафтии, Ендру Кук.

Магазин | пред 2 години

Василичарски гала оперски концерт вечерва во МОБ

По синоќешниот, вечер во Македонската опера и балет ќе се одржи уште еден гала оперски концерт по повод празникот Василица.Како што информираат од МОБ, за да се одбележи традицијата на Василица, кога се крши лепче со паричка, вечер публиката во фоајето ќе има можност да земе лепче со паричка, а среќниот кому ќе му се падне ќе добие гратис-билети за целата сезона на Македонската опера и балет.– Традицијата востановена пред повеќе од 25 години продолжува. Оваа година нашата верна публика ќе има можност да ужива во изведбите на некои од највпечатливите арии, дуети и хорски делници од светски познатите оперски дела од композиторите: Пучини, Верди, Џордано, де Либ, Штраус – помладиот, стои во соопштението од МОБ.Диригенти ќе бидат Бисера Чадловска и Иван Еминовиќ, режисер – Дејан Прошев, концерт мајстор – Верица Ламбевска и хор мајстор – Јасмина Ѓорѓеска.На концертот ќе настапат нашите оперски уметници Славица Петровска – Галиќ (сопран), Весна Ѓиновска – Илкова (сопран), Сандра Митровска (сопран), Дешира Ахмети – Крлиу (сопран), Наде Талевска (сопран), Ирена Кавкалевска (мецосопран), Ѓорѓи Цуцковски (тенор), Зоран Сотиров (тенор), Борис Трајанов (баритон), Марјан Јованоски (баритон), Игор Дурловски (бас) и Александар Стефаноски (бас).

Магазин | пред 3 години