НЕНАД САВЕСКИ

Ленче Ристоска преку СМС го известила Савески дека си заминува: Од медиумите ги дознав причините

Републичкиот јавен обвинител Ненад Савески изрази жалење за оставката на обвинителката Ленче Ристоска, наведувајќи дека станува збор за лична одлука за која бил информиран по нејзиното поднесување.„Во принцип не сакам да коментирам лични одлуки, но сепак изразувам жалење за одлуката на колешката Ристоска. За ваквиот чин и од неа лично бев известен преку СМС порака по поднесување на оставката, а за причините за истата дознав од медиумите“, изјави Савески.Тој посочи дека обвинителството останува без искусен кадар од кој очекувал значаен придонес, особено во делот на меѓународната соработка.„Јавното обвинителство останува без јавен обвинител од кој очекував дека со своето повеќегодишно драгоцено искуство ќе даде придонес кон зајакнување на капацитетите на оваа институција, особено со нејзината позиција како обвинител за врски со Европравда“, рече Савески.Во однос на одлуката за повлекување на овластувањата, тој нагласи дека таа не е насочена кон Ристоска.„Одлуката за отповикување на сите овластувања дадени од моите претходници не е персонална и во никој случај не е насочена кон работата на обвинителката Ристоска. Таа одлука е од организациска природа и нејзината цел е зголемување на ефикасното постапување“, изјави тој.Савески упати повик до јавните обвинители да го зачуваат професионалниот интегритет, но и до јавноста и општествените чинители да не се нарушува угледот на институцијата.„Сите одлуки што ги носам се во насока да ја гарантирам независноста и самостојноста во работењето на Јавното обвинителство“, порача Савески.

Македонија | пред 2 часа

Савески даде заклетва: Политиката не е мој интерес, селекција на предмети не правам, товар не чувствувам

Новоименуваниот државен јавен обвинител Ненад Савески, по давањето на свечената заклетва, порача дека обвинителството мора да функционира исклучиво врз основа на законите, без влијание од политиката.„Интересите на политичките партии не се предмет на мој интерес. Политиката не била и нема да биде дел од мојата работа. Без оглед на тоа колку гласови сум добил, мојата работа ќе зависи од законските обврски“, изјави Савески, осврнувајќи се на фактот дека неговиот избор не доби поддршка од опозицијата.Тој нагласи дека нема да прави селекција на предметите и дека секој случај ќе има еднакво значење.„Секој предмет има еднаква тежина. Нема да има приоритети по нарачка, ниту од било кого. Постојат законски процедури по кои ќе се постапува и тие важат за сите“, рече Савески, одговарајќи на прашања за евентуални политички влијанија врз отворање или ревидирање на случаи.Во однос на прашањето за расчистување со последиците од поранешното Специјално јавно обвинителство, кратко одговори дека веќе дал став на таа тема.Како приоритет во својата работа, Савески ја најави модернизацијата на обвинителството.„Прво ќе се сретнам со обвинителите за да се запознаам со состојбите. Планот е дигитализација на системот за управување со предмети, преку кој ќе се следи работата и ќе се обезбеди поголема ефикасност. Ќе гарантирам транспарентност и отчетност – јавноста ќе има одговори за секој предмет“, истакна новиот државен обвинител.

Македонија | пред 2 седмици

На 18 март одлука во Собранието: дали Савески ќе стане државен јавен обвинител

На 18 март во Собранието е закажана седница на која Ненад Савески треба да биде именуван за нов државен јавен обвинител.Савески, досегашен судија од Кривичен суд, беше предложен од Владата на 10 март, а за да биде изгласан од Собранието, потребно е да добие поддршка од 61 пратеник.Тој беше еден од четворицата кандидати за кои Советот на јавни обвинители во февруари годинава даде позитивно мислење. Портпаролката на Владата, Марија Митева, по седницата изјави дека одлуката е донесена по конструктивна дискусија во која се разгледувале сите аспекти на кандидатите – од професионално искуство до личен интегритет.

Македонија | пред 2 седмици

Беше обвинител, стана судија, судеше за притвори во „27 април“, сега правораздава за Рашковски: кој е предложениот републички обвинител Савески

Судија во Одделот за организиран криминал и корупција при Основниот кривичен суд Скопје, поранешен јавен обвинител и долгогодишен правосуден кадар – ова е професионалниот профил на Ненад Савески, кого Владата го предложи за нов државен јавен обвинител.Савески судиска тога носи од 2016 година и работи во кривичниот суд во Скопје, каде постапува во предмети поврзани со организиран криминал и корупција. Пред да стане судија, седум години беше јавен обвинител во Основното јавно обвинителство, а претходно работел како стручен соработник и судски приправник во Основниот суд во Гостивар.Во јавноста е познат по учеството во повеќе предмети со висок јавен интерес. Во моментот го води повтореното судење против поранешниот генерален секретар на Владата, Драги Рашковски. Во претходна постапка одлучуваше и во случајот познат како „27 април“, кога за дел од осомничените определи ефективен притвор во затворот „Скопје“ во Шутка, додека за други беа изречени мерки куќен притвор.За Савески во 2017 година се пишуваше и дека е еден од судиите во Кривичниот суд преку кои не можеле лесно да поминат мерките и барањата предложени од Специјалното јавно обвинителство против функционери осомничени за криминал.Ненад Савески е роден на 22 јули 1976 година. По националност е Македонец, оженет е и татко на три деца, а живее во Гостивар.Дипломирал на Правниот факултет „Јустинијан Први“ при Универзитетот „Св. Кирил и Методиј“ во Скопје, каде што подоцна стекнал и магистерска титула по казнено право. Правосудниот испит го положил во 2003 година. Средното образование го завршил во гимназијата „Панче Попоски“ во Гостивар.Професионалната кариера ја започнал како судски приправник во Основниот суд во Гостивар во периодот од 2000 до 2002 година, по што работел како стручен соработник во истиот суд до 2009 година. Во 2009 година бил избран за јавен обвинител, функција што ја извршувал седум години.Покрај судиската работа, Савески има и меѓународни и експертски ангажмани. Бил експерт во мисијата на ОБСЕ во Македонија и учествувал во Националната конвенција за Европската Унија во рамки на Поглавје 23, кое се однесува на правосудството и фундаменталните права. Учествувал и во повеќе работни групи за судски и законски реформи.Како експерт бил ангажиран и во проекти на Советот на Европа, ОБСЕ и УСАИД, каде работел на теми поврзани со посебните истражни мерки, притворот и кривичната постапка.Во академската сфера, Савески е предавач во Академијата за судии и јавни обвинители, каде што учествува во обуката на идни судии и обвинители. Тој е и национален тутор и обучувач во програмата HELP на Советот на Европа, како и обучувач во областа на човековите права и кривичното право.Автор е и коавтор на повеќе научни трудови и публикации кои се однесуваат на посебните истражни мерки, слободата на изразување, клеветата и навредата, конфискацијата на имот и правото на приватност. Во периодот од 2022 до 2024 година учествувал и како коавтор на повеќе стручни водичи и публикации.Освен македонски, зборува англиски и германски јазик, а има познавања и од српско-хрватски и основно ниво на албански јазик.

Македонија | пред 3 седмици

Имаше дискусија за идниот јавен обвинител, по мислењето од Советот, вели владината портпаролка за изборот на Савески

Портпаролката на Владата, Марија Митева на денешната прес-конференција објави дека обивнителот Ненад Савески е предлог на Владата за нов државен јавен обвинител. Таа на новинарско прашање што било клучно за тој да биде избран, одговори дека овој кандидат има богато професионално искуство.Владата, како што можав да кажам и на самата прес-конференција, навистина имаше конструктивна дискусија, по однос и на професионалниот, но и на личниот кредибилитет, којшто секој еден од кандидатите го поседува, којшто го има и одлучи како предлог на Собранието да го предложи овој кандидат, којшто со своето богато и професионално, но и личен интегритет, којшто го има, цениме дека ќе придонесе кон зајакнување на она што значи правосуден систем и она што ние досега го имаме, а тоа е 2% доверба“, изјави Митева.Таа додаде дека имало конструктивна дискусија и се разгледувале сите апектиЈас, како што најавив и во самиот прес, можам да кажам дека навистина имаше конструктивна дискусија во рамки на владата, дека навистина се разгледуваа сите аспекти. Можавте да слушнете за професионалното искуство на судијата, којшто владата го предлага, ценевме дека можеби ова е најдобриот кандидат, којшто ќе треба да даде навистина еден нов степен во јавното обвинителство. Знаете дека тоа е институција којашто во минатото навистина беше пример за тоа како се работеше во негативна смисла, треба да го промениме тоа, треба да дадеме кандидат којшто навистина, покрај професионалниот, ќе има и личен интегритет, ќе има и меѓународно искуство. Јас бев многу детална во однос и на самото портфолио на кандидатот, којшто го предложивме, и истиот предлог ќе го доставиме до Собранието за понатамошно разгледување, се разбира избор“, изјави Митева.

Македонија | пред 3 седмици

Ненад Савески предложен за нов државен јавен обвинител, следи гласање во Собрание

На денешната владина седница, беше изгласан предлогот за нов државен јавен обвинител – Ненад Савески, дознава Скопје1.Следниот чекор е негово финално изгласување во Собранието на Република Северна Македонија, каде што за избор се потребни најмалку 61 глас.Ненад Савески ќе дојде на местото на Љупчо Коцевски, кој поднесе оставка во декември минатата година.Претходно за оваа позиција се пријавија пет кандидати, а Советот на јавни обвинители даде позитивно мислење за четворица од нив: Анита Тополова-Исајловска (сегашна вршителка на должност), Ленче Ристоска, Лидија Раичевиќ и судијата Ненад Савески.Ненад Савески доби позитивна оценка од сите десет членови на Совет на јавни обвинители.Постапката за избор започна со огласот што го распиша Собранието на 12 јануари годинава, со рок за пријавување од 15 дена од денот на објавувањето во „Службен весник“. Кандидатите мораат да имаат најмалку 10 години непрекинат стаж како јавни обвинители или судии од областа на кривичното право.

Македонија | пред 3 седмици