„Пациентот не треба да носи папки и ЦД-а“ – Алиу најави нова ера на дигитално здравство

Министерот за здравство Азир Алиу, по повод една година од преземањето на функцијата, порача дека неговата цел не била да создаде впечаток дека сите проблеми во здравството се решени, туку да започне нивно системско надминување.

— реклама —

„Здравството е еден од најсложените и најчувствителните системи во државата. Секоја слабост ја чувствува пациентот, а секое одложување значи изгубено време за некого кому му е потребна грижа“, истакна Алиу во видеообраќањето.

— реклама —

Тој посочи дека биле наследени бројни предизвици, меѓу кои недостиг на кадар, нерамномерна достапност на услугите, застарена инфраструктура и систем кој предолго функционирал со хартиена документација и фрагментирани податоци.

Според Алиу, во изминатата година е поставена нова насока на развој преку дигитална трансформација, воведување транспарентни листи на чекање и развој на телемедицината во Дебар и Делчево, со цел специјалистичките услуги да им бидат подостапни на граѓаните.

— реклама —

Тој нагласи дека се инвестира и во регионалните здравствени центри, преку проекти во Штип, Тетово, Кичево, Струмица и Битола, како и преку набавка на 100 нови амбулантни возила и реконструкција на операциони сали.

„Не сме на крајот од реформите. Се наоѓаме во нивната најважна фаза – поставување на системот на нови основи. Имаме уште многу работа, но денес знаеме појасно каде одиме – кон дигитално поврзано, кадровски планирано и пациентски ориентирано здравство“, порача министерот Алиу.