Техничките разговори за спроведување на договорот меѓу Соединетите Американски Држави и Иран ќе се одржат утре во Швајцарија, соопшти пакистанското Министерство за надворешни работи.
Според соопштението, средбите ќе се одржат во Бургеншток, а во нив, покрај американските и иранските претставници, ќе учествуваат и посредници од Пакистан и Катар.
Разговорите следуваат по потпишувањето на меморандумот за разбирање меѓу Вашингтон и Техеран, чија цел е намалување на тензиите и ставање крај на конфликтите на Блискиот Исток.
Првичната рунда разговори требаше да се одржи во петокот, но беше одложена поради новите судири меѓу израелската армија и Хезболах во Либан.
Во меѓувреме, пакистанскиот министер за внатрешни работи отпатува во Иран, додека министерот за надворешни работи замина за Каиро на разговори посветени на безбедносната состојба на Блискиот Исток.
Пакистан од април годинава официјално ја има улогата на посредник меѓу САД и Иран и активно учествува во дипломатските напори за намалување на регионалните тензии.
Вашингтон и Техеран претходно оваа седмица постигнаа рамковен договор кој предвидува прекин на непријателствата во регионот и обновување на трговскиот сообраќај низ Ормускиот Теснец.
Според договореното, дополнителни разговори за чувствителни прашања, меѓу кои и иранската нуклеарна програма, треба да се одржат во рок од 60 дена.
Сепак, иднината на договорот повторно беше доведена во прашање откако Иран денеска соопшти дека повторно го затвора Ормускиот Теснец, обвинувајќи го Израел за наводно прекршување на примирјето со Хезболах.
И покрај новите тензии, засега остануваат во сила плановите за продолжување на разговорите во Швајцарија.
