„Пензионирањето не е крај на активниот живот, туку нова можност за мудроста и искуството“, вели Сиљановска-Давкова

Пензионерскиот живот може да биде период на нови активности, дружење и искористување на животното искуство, порача претседателката Гордана Сиљановска-Давкова на отворањето на 30. Републички пензионерски спортски натпревари во Охрид.

„Логично е да бидам меѓу вас, бидејќи и јас сум една од вас“, порача Сиљановска-Давкова, нагласувајќи дека пензионирањето не треба да се сфаќа како крај на активниот живот, туку како почеток на нов животен циклус во кој мудроста, знаењето и искуството можат особено да дојдат до израз.

— реклама —

Таа истакна дека спортот не е важен само за физичкото, туку и за менталното здравје, бидејќи го поттикнува дружењето, ја зајакнува позитивната енергија и помага полесно да се надминуваат неуспесите.

— реклама —

Говорејќи за правата на пензионерите, претседателката порача дека тие треба активно да бидат вклучени во креирањето на политиките, особено при донесувањето закони и одлуки што директно ги засегаат.

Сиљановска-Давкова го посочи и примерот на Јапонија, земја позната по долговечноста на населението. Како една од причините за тоа ја наведе филозофијата „икигаи“, според која секој човек треба да има причина за постоење и цели кон кои ќе се стреми.

— реклама —

На учесниците им посака ферплеј, витешка борба и успех, како и уште многу спортски натпревари во иднина.

На отворањето се обратија и претседателката на Сојузот на здруженија на пензионери на Македонија, Станка Трајкова, градоначалникот на Охрид, Кирил Пецаков, претседателката на Здружението на друштва на пензионери на Словенија, Зденка Јан, и претставникот на Министерството за спорт, Илија Ристески.

На 30. Републички пензионерски спортски натпревари учествуваат 312 натпреварувачи од 41 здружение, членки на Сојузот.