Пензиските реформи, семејната политика и медиумите во фокусот на денешните собраниски расправи

Собраниските комисии денеска продолжуваат со разгледување на повеќе законски решенија од различни области, меѓу кои и измените на Законот за аудио и аудиовизуелни медиумски услуги.

Предлог-законот, кој е на дневен ред на Комисијата за транспорт, дигитална трансформација, животна средина и просторно планирање, ќе се разгледува во второ читање. За него е поднесен еден амандман од пратеникот на СДСМ, Оливер Спасовски.

— реклама —

Предложените измени предвидуваат поинаков начин на финансирање на радиодифузната дејност, со цел да се обезбедат поголема стабилност и предвидливост. Средствата би се утврдувале на секои пет години и би се обезбедувале од државниот Буџет, во висина од еден процент од остварените даночни приходи, според последната усвоена завршна сметка пред донесувањето на новиот Буџет.

— реклама —

По истекот на секој петгодишен период, износот ќе се преиспитува и повторно ќе се утврдува за следните пет години. Целта е да се обезбеди непрекинато финансирање на радиодифузната дејност, без да се нарушат ликвидноста и редовното функционирање на државниот Буџет.

Седници за денеска се закажани и на Комисијата за социјална политика, демографија и млади и на Законодавно-правната комисија.

— реклама —

Членовите на Комисијата за социјална политика ќе разгледуваат измени на законите за задолжително и доброволно капитално финансирано пензиско осигурување, како и на Законот за семејството. Сите три предлог-закони се во прво читање.

— реклама —

Законодавно-правната комисија, пак, ќе расправа за повеќе законски решенија, меѓу кои измените на законите за пензиско осигурување, семејството, земјоделството и руралниот развој и Фондот за осигурување на депозити, како и предлог-закони поврзани со семејната и станбената поддршка.

На дневен ред се и предлог-законот за укинување на Законот за координација на безбедносно-разузнавачката заедница, измените на Законот за аудио и аудиовизуелни медиумски услуги и измените на Законот за приватизација и закуп на градежно земјиште во државна сопственост.