Пилот на мал авион во Велика Британија привлече големо внимание откако за време на двочасовен пробен лет со траекторијата на летот ја испиша пораката „I’m bored“ („Здодевно ми е“).
Според податоците од платформата за следење летови „Флајтрадар24“, авионот полетал од Ливерпул, а потоа летал над полуостровот Вирал, Чешир и Северен Велс, оставајќи траекторија што ги формирала зборовите „I’m bored“.
Од авиокомпанијата соопштија дека авионот „Пајпер Томахок“ бил на пробен лет по замена на еден дел, а го управувал инструктор по летање на возраст меѓу 20 и 30 години.
Менаџерот за операции, Вејн Барет, изјави дека пилотот веројатно сакал малку да се забавува за време на рутинскиот лет.
„Мислам дека навистина малку му било здодевно бидејќи стануваше збор само за пробен лет. Но, мора да се признае дека летањето беше изведено многу вешто“, рече Барет.
Тој објасни дека по замената на еден цилиндар на моторот било неопходно да се изврши пробен лет за да се провери дали авионот функционира исправно.
Според него, пилотот не е дисциплински санкциониран, а авионот безбедно се вратил во хангар. Единствената последица, како што рече Барет, е тоа што необичниот лет привлекол големо медиумско внимание.
