„Планира ли некој да ја извести Јаневска дека студентскиот оброк, спротивно на Закон, три години не е покачен или свесно продолжува да лаже?!“, велат од Левица

Опозициската партија Левица преку соопштение ја обвини министерката за образование и наука Весна Јаневска дека три години не е зголемен износот на субвенционираниот студентски оброк, иако, според партијата, постои законска обврска за негово усогласување.

Од Левица велат дека студентскиот оброк од 140 денари е непроменет од 2023 година, а истиот износ, како што посочуваат, бил предвиден и во јавните повици на Министерството за образование и наука во 2024 и 2025 година, како и за академската 2025/2026 година.

— реклама —

„Откако неколкупати ѝ укажавме на Весна Јаневска дека студентскиот оброк останал закован на 140 денари од 2023 година, министерката сега соопшти дека не планира да го зголеми бидејќи студентите не се пожалиле“, велат од Левица.

Партијата ја обвинува министерката дека примената на законските права ја условува со тоа дали студентите ќе поднесат поплаки, наместо Министерството само да ги почитува законските обврски.

— реклама —

Од Левица потсетуваат дека во август 2024 година, веќе во мандатот на актуелната влада, МОН објавил јавен повик за субвенциониран студентски оброк со износ од 140 денари. Според нив, истиот износ бил предвиден и во следните повици.

— реклама —

„Нема ни 147, ни дополнителни 20 денари со кои продолжува да се тврди дека студентскиот оброк се зголемил по доаѓањето на ДПМНЕ“, наведуваат од партијата.

Од Левица прашуваат и како со 140 денари студентите денес можат да обезбедат здрав, пристоен и нутритивно вреден оброк, имајќи ги предвид зголемените цени на храната.

— реклама —

Партијата ја обвини власта и за двојни стандарди, оценувајќи дека за функционерските привилегии не се чека ничија поплака, додека студентите, според нив, се оставаат да бараат нешто што претставува законски уредено право.

На крајот, од Левица тврдат дека Владата во ниту еден момент не го зголемила студентскиот оброк и дека, според нивните пресметки, поради неусогласувањето со законските одредби, студентите се оштетени за околу 6,5 милиони евра.