Италија се подготвува повторно да ја воведе нуклеарната енергија, речиси четири децении откако по катастрофата во Чернобил ги затвори своите нуклеарни електрани. Владата на премиерката Џорџа Мелони смета дека овој чекор ќе ја зајакне енергетската безбедност на земјата и ќе помогне во исполнувањето на климатските цели.
Следната недела италијанскиот парламент треба да го усвои законскиот пакет што ќе овозможи развој на новата генерација нуклеарни технологии. Потоа Владата ќе има рок од една година да ги донесе правилата за лиценцирање на реакторите, безбедносните стандарди, управувањето со нуклеарниот отпад и изборот на локации.
Министерот за животна средина и енергетска безбедност Џилберто Пикето Фратин изјави дека побарувачката за електрична енергија во следната деценија би можела да порасне за најмалку 30 проценти, поради што, покрај обновливите извори, ќе бидат потребни и нови решенија. Според него, првите реактори од новата генерација би можеле да почнат со работа меѓу 2033 и 2035 година.
Италија веќе двапати на референдум се изјасни против нуклеарната енергија – во 1987 година, по катастрофата во Чернобил, и во 2011 година, по несреќата во Фукушима. Сепак, најновите анкети покажуваат дека околу 55 проценти од Италијанците сега ја поддржуваат изградбата на нуклеарни електрани од новата генерација, при што поддршката е најсилна кај помладите граѓани.
Владата планира да се потпре на мали модуларни реактори (SMR), кои се сметаат за побезбедни и побрзи за изградба од класичните нуклеарни централи. Но, експертите предупредуваат дека проектот ќе бара милијарди евра инвестиции и дека остануваат сериозни предизвици, особено околу изборот на локации и трајното складирање на радиоактивниот отпад.
Противниците на планот најавуваат дека би можеле повторно да иницираат референдум, додека анкетите покажуваат дека поддршката за нуклеарната енергија значително опаѓа кога граѓаните треба да се изјаснат за изградба на реактор во нивната непосредна близина.
