Четири дена по силниот земјотрес што го погоди источниот дел на Индонезија, спасувачите пронајдоа жива 84-годишна жена под урнатините на нејзиниот семеен дом.
Земјотресот со магнитуда од 7,7 степени во саботата го погоди подрачјето во близина на островот Флорес. Во несреќата загинале најмалку 73 лица, повеќе од 900 се повредени, а речиси 60.000 жители биле принудени да ги напуштат своите домови.
Осумдесет и четиригодишната Полина Поби била затрупана под урнати бамбусови ѕидови во нејзиниот дом во селото Нитунглеа. Пристапот до селото бил отежнат поради свлечиште предизвикано од земјотресот, па спасувачите успеале да стигнат до неа дури во вторникот.
Жената била извлечена жива и без повреди и била пренесена во најблиската здравствена установа. Според локалните власти, била неподвижна и не можела да зборува, а семејството ја пронашло дури четвртиот ден. Иако била ослабена поради тоа што со денови немала ниту храна ниту вода, не се здобила со повреди.
Во меѓувреме, спасувачките екипи продолжуваат да ги пребаруваат урнатините, додека помошта до погодените подрачја пристигнува отежнато поради планинскиот терен и оштетените патишта. Досега биле доставени околу 398 тони помош, вклучително и храна, шатори и привремени засолништа.
Ситуацијата дополнително ја отежнуваат последователните потреси. Од саботата биле регистрирани повеќе од 3.000, од кои најмалку 86 биле доволно силни за да ги почувствуваат жителите. Поради постојаното тресење, многумина сè уште се плашат да се вратат во оштетените домови.
